Bronsesvampen til Per Manne

Førsteamanuensis Per Manne er vinnar av haustsemesterets Bronsesvamp.

20.12.2013 - Øyvind Torvund. Foto: Hallvard Lyssand

- Dette er veldig stas. Prisen er eit tydeleg bevis på at det vi gjer faktisk fungerer. Det blir ekstra gledeleg når det er studentane som står bak kåringa. Det er jo dei vi møter kvar dag, seier Per Manne.

Tek studentane på alvor

Bronsesvampen er ein pris som studentane ved NHH deler ut kvart semester for å heidra førelesarar som gjer ein ekstra innsats for bachelorstudentane på skulen.

Manne får prisen for undervisninga i MET 020 - Matematikk for økonomar. Det er andre gong han får denne prisen.

- Ein skal ta studentane på alvor. Ein skal ikkje gjere det så lett som muleg, for dei set pris på å bli utfordra. Samtidig er det viktig å ha bakkekontakt og vite kvar dei står og kva som er realistisk å gjere. Så er det sjølvsagt også viktig å vere glad i faget sitt, seier Manne.

I grunngjevinga heiter det at Manne gjennom ei årrekkje har utmerka seg som ein strukturert, pedagogisk og fageleg dyktig førelesar. Faget er krevjande og stiller høge krav til både førelesar og studentane.

- Morsom og imøtekommande

Vidare heiter det at Manne på ein eksemplarisk måte har lagt til rette for at studentane skal kunne lære seg faget på ein best muleg måte og oppleve høg grad av mestring.

Dette er mellom anna gjort gjennom detaljerte førelesningsnotat, velorganiserte gruppetimar og utforming av ein konkret plan for korleis studentane kan komme gjennom pensum.

I tillegg har denne førelesaren utnytta dei digitale hjelpemidla nybygget tilbyr på en framifrå måte. Studentane meiner han er morosam, imøtekomande og har stålkontroll i faget sitt, står det i grunngjevinga.

HEIDRA: Ein fornøgd Per Manne mottok haustsemesterets Bronsesvamp frå to av studentane i fagutvalet til NHHS.