- Dynamisk styring meir effektivt i krisetider

- Stadig fleire bedrifter innfører eller vurderer dynamiske styringssystem. Det kan t.d. vera meir effektivt i krisetider, seier professor Martin Messner frå Universitetet i Innsbruck.

Blant føredragshaldarane under Beyond Budgeting-seminaret var Martin Messner, som er professor i verksemdsstyring ved Universitetet i Innsbruck.

Messner forskar m.a. på prestasjonsmåling og planleggingsprosessar og utarbeiding av prognosar.

Han var invitert til NHH for å presentera eit prosjekt der han studerer detaljane i planleggingsprosessar for å sjå korleis slike prosessar er sett saman.

- Vi prøver å skildra mikropraksisane som planleggingsprosessar består av og å syna kva utfordringar verksemder kan møta i slike prosessar, forklarar Messner.

Ulike bransjar, ulike utfordringar

Ein del av arbeidet er ein empirisk studie av ei stor multinasjonal produksjonsverksemd med hovudkontor i USA.

Selskapet - som Messner ikkje kan røpa namnet på - har tilliks med Statoil gått inn for å få på plass meir dynamiske planleggingsprosessar og styringssystem, men ikkje i så stor grad.

- Det er likskapar å finna mellom Statoil og selskapet vi har studert, men førstnemnte har kome lengre i sitt arbeid, seier Messner.

Han trekk fram nokre sentrale forskjellar mellom selskapa.

- Statoil er produksjonsdrive. Salssida er meir eller mindre automatisk. Enkelt sagt har oljeselskap alltid kundar, seier Messner.

- For selskapet eg har studert er derimot salsprognosar ein nøkkelfaktor. Dei må veta om det faktisk er etterspurnad etter produkta deira før dei byrjar å produsera. I slike etterspurnadsdrivne bransjar vert ein meir eksponert for endringar på kundesida av marknaden, og det kan gje større planleggingsmessige utfordringar, legg han til.

Professor Martin Messner frå Universitetet i Innsbruck forskar på m.a. på styrings- og planleggingssystem.

Frigjering frå kalenderen

I følgje professor Messner er det stadig fleire selskap som innfører eller planlegg å innføra meir dynamiske styringssystem.

- Mange av dei vil møta dei same utfordringane når dei går i gang med implementeringa, konstaterer han.

- Dei fleste verksemder har system som er tett knytt til kalenderen, og måten dei tilsette tenkjer på er knytt til dette. Å bli meir dynamisk handlar om å frigjera seg frå slike band.

Korleis selskapa legg opp prosessen er på ingen måte uvesentleg.

- I selskapet eg har sett på byrja overgangen til meir dynamisk styring i eit dotterselskap med base i England, medan hovudkvarteret i USA fortsette med meir tradisjonelle system. No prøver dei å føra prosessen vidare til globalt nivå.

- I Statoil kom derimot initiativet frå toppleiinga. Det er ein viktig forskjell, fastslår forskaren.

Meir effektivt

Men kva er det verksemdene får att for å blir meir dynamiske?

- Økonomiske krisar er gode døme på store planleggingsutfordringar. Verksemdene har planlagt ut frå ein del føresetnader, men så inntreff ei krise som får alt til å sjå heilt annleis ut.

- I turbulente omgjevnader der føresetnadene endrar seg brått kan ei dynamisk tilnærming vera meir effektiv, konkluderer Martin Messner.