Disputas: Evaluering av offentlege næringstiltak
Olav Andreas Kvitastein disputerer for doktorgraden ved NHH torsdag 24. juni 2010 med avhandlinga Three papers on evaluations: The "what if" in the evaluation of public programs. In English
21.06.2010 - Red.
Olav Andreas Kvitastein si doktoravhandling vurderer effekten av finansielle støtteordningar og stimuleringsprogram i regi av Innovasjon Norge.
Resultata tyder på at Innovasjon Norge sine tiltak regionale risikolån og investeringstilskot begge gjev positive bidrag til verdiskaping, medan resultata for nettverksprogrammet og FRAM- programmet er meir tvetydige
Innovasjon Norge har ansvar for store deler av den nasjonale nærings- og regionalpolitikken i form av tiltak for å fremje vekst og nyetablering innan rammer gitt av EØS-avtalens regelverk. Kva som vert skapt av pengebruken ser ein berre i ettertid. Det er derfor viktig å få godtgjort at gjennomførte tiltak fungerer i samsvar med intensjonar.
Føremålet med den nasjonale nærings- og regionalpolitikken er å kompensere for ulikskapar i vilkår for næringsverksemd og leggje til rette for vekst og nyskaping. Utforminga av nye tiltak byggjer på teori og røynsle om kva som har fungert før.
Godt forarbeid gjev likevel ingen garanti for at dei program og prosjekt som vert realiserte har den effekt ein ønskjer. Innan økonometrisk evalueringsforsking har ein dei seinare åra utvikla reiskap og tenkjemåtar som gjer det mogeleg å koma nærmare realistiske anslag på effektar av tiltak. Desse tenkje- og reknemåtane utgjer grunnlaget for presentasjonar av økonomiske effektar av offentlege tiltak i avhandlinga.
Det essensielle ved evalueringar av offentlege tiltak er vurderinga av kva som er oppnådd, samanlikna med den tilstanden ein mest sannsynleg hadde hatt om tiltaka ikkje var gjennomførte. Metodikk for å samanlikne den kontrafaktiske og den faktiske situasjon er eit gjennomgåande tema i avhandlinga.
Tre sjølvstendige arbeid om evaluering av offentlege næringstiltak utgjer avhandlinga.
Det første arbeidet drøftar effektar i form av verdiskaping for ulike tiltak i regi av Innovasjon Norge.
Det andre arbeidet studerer effektar i form av endringar i forventa levetid for deltakande verksemder i eit program for utvikling av leiarskap. Begge desse arbeida er basert på offentleg tilgjengelege registerdata. Evalueringsforskinga er prega av mangearta og ulike metodiske tilnærmingar.
Det tredje arbeidet drøftar metodologiske kløyvingar innanfor det etablerte evalueringsmiljøet.
Olav Andreas Kvitastein er oppvaksen i Tørvikbygd i Hardanger. Han har vore tilsett som forskar ved Stiftelsen for samfunns- og næringslivsforskning (SNF) og hatt engasjement som stipendiat og førsteamanuensis ved NHH.
Tema for prøveførelesinga: Program evaluation and cost-benefit analysis, what is the difference?
Tid og stad: Torsdag 24. juni kl. 11.15 i Karl Borch auditorium, NHH
Avhandlingens tittel: Three papers on evaluations: The "what if" in the evaluation of public programs.
Tid og stad for disputasen: Torsdag 24. juni kl. 13.15 i Karl Borchs auditorium, NHH
Hovudrettleiar: Professor Kjell Grønhaug, NHH
Bedømmelseskomité:
Professor Kjell Gunnar Salvanes, NHH (leiar)
Førsteamanuensis Arild Aakvik, Universitetet i Bergen
Professor Torger Reve, Handelshøyskolen BI
Professor Arne Kalleberg, University of North Carolina at Chapel Hill
|
