Ledige stipendiatstillingar ved NHH
Ved Norges Handelshøyskole er det ledige fireårige stipendiatstillingar.
14.01.2004 - Afsoun Sabzian
Norges Handelshøyskole vart grunnlagt i 1936, og utgjer i dag landets leiande fagmiljø innan økonomisk-administrative fag. NHH er norsk medlem av Community of European Management Schools (CEMS).
Høgskulen har i dag over 2800 heiltidsstudentar, ein samla stab på over 300 personar, og samarbeider nært med stiftingane Administrativt forskningsfond (AFF) og Stiftelsen for samfunns- og næringslivsforskning (SNF). Til saman utgjer NHH og dei tilknytte stiftingane eit stort fagleg og praktisk fellesskap med meir enn 500 tilsette.
Stipendiatstillingane er ledige ved følgjande institutt:
- Institutt for foretaksøkonomi (føretaksøkonomi, matematikk og statistikk)
- Institutt for regnskap, revisjon og rettsvitenskap
- Institutt for strategi og ledelse (marketing, organisasjonsfag og informasjonsbehandling)
- Institutt for samfunnsøkonomi (samfunnsøkonomi, økonomisk historie og økonomisk geografi)
- Institutt for fagspråk og interkulturell kommunikasjon
Høgskulen vil vurdere tilsetjing i samanheng med den aktuelle rekrutteringssituasjonen. Tilsetjing føreset opptak i doktorgradsprogrammet ved NHH.
Søkjarar må minst ha eksamen som cand.merc. eller cand.oecon. ved Norges Handelshøyskole eller tilsvarande høgare grads eksamen som er relevant for vedkommande sitt doktorgradsstudium, og for arbeidet med avhandlinga. Studentar som er i gang med høgare studium, som avsluttar utdanninga i inneverande semester, og som tek sikte på å byrja på doktorgradsstudiet hausten 2004, kan og søkje.
For kandidatar med anna utdanning enn frå NHH krevst det minst Master of Science eller tilsvarande grad, der minimum 18 månader skal være økonomi og administrasjon eller samfunnsøkonomi. Kandidatar med utdanning frå utlandet må sørgje for at dokumenterte resultat frå GMAT/GRE vert tilsendt NHH.
Interesserte vil kunne få nærare opplysningar om stillingane og dei vidaregåande studia ved å vende seg til instituttstyrarane. Informasjon om doktorgradsstudiet og stipendiatstillingar finst på www.nhh.no. Stipendiatar må delta i arbeidet ved det instituttet dei er knytte til, etter nærare avtale med instituttet. Pliktarbeidet utgjer 25 prosent av stillingsbrøk.
Stillingane har stillingskode 1017 og vert løna i lstg. 37. Frå løna vert trekt 2 prosent til Statens Pensjonskasse. Søknaden skal skrivast på eige skjema. På skjemaet er det spesifisert kva vedlegg som skal leggjast ved søknaden. Det vert tilrådd å søkje rettleiing hjå faglærar ved høgskulen ved oppsetjing av plan for studia. Kontakt kan gjerast over tlf. 55 95 90 00.
Den statlege arbeidsstyrken skal i størst mogleg grad gjenspegle mangfaldet i befolkninga. Det er difor eit personalpolitisk mål å oppnå ein balansert kjønns- og alderssamansetning og rekruttere personar med innvandrarbakgrunn. Kvinner og personar med innvandrarbakgrunn blir oppfordra til å søkje. Dersom søkjarane står tilnærma likt, vil kvinnelege søkjarar bli føretrekte.
Søknadsskjema kan ein få ved å vende seg til personal- og organisasjonsavdelinga ved høgskulen,tlf. 55 95 94 80, eller på http://www.nhh.no/adm/personal
Søknad skal sendast til Norges Handelshøyskole, personal- og organisasjonsavdelinga, Helleveien 30, 5045 Bergen. Søknaden merkes "stillingsnummer 005/2004"
Søknadsfrist 20.02.04
Tilsetjing i stipendiatstillingar i samarbeid med høgskular innanfor Norgesnettet kan og vere aktuelt.
|
