Ledige stillingar som førsteamanuensis

Ved Norges Handelshøyskole er det ledige stillingar som førsteamanuensis i engelsk språk og samfunnsøkonomi (økonometri og makroøkonomi).

18.02.2003 - Anette W. Petersen

Institutt for språk: Førsteamanuensis i moderne engelsk språk. Institutt for språk omfattar faga engelsk, fransk, japansk, spansk og tysk. Sentralt i instituttet sine studieprogram står språk med særleg vekt på økonomisk-administrativt fagspråk i vid forstand. Til stillinga høyrer plikt til undervisning og forsking på relevante felt innan engelsk språk.

For nærare opplysningar, kontakt instituttstyrar, professor Magnar Brekke (tlf. 55 95 93 29)

Institutt for samfunnsøkonomi: To stillingar som førsteamanuensis i samfunnsøkonomi innan fagområda økonometri og makroøkonomi. Stillingane er knytt til seksjon for samfunnsøkonomi.

For nærare opplysningar, kontakt instituttstyrar, professor Kjell G. Salvanes (tlf. 55 95 93 15)

Felles for dei tre stillingane:
Arbeidsoppgåvene m.m. som ligg til stillinga er nærare skildra i ein stillingsomtale, som ein kan få ved å venda seg til NHH. Det kan vera aktuelt med intervju og prøveforelesing eller seminar.

Den som blir tilsett, må retta seg etter dei føresegnene som til kvar tid gjeld for stillinga. Nytilsett som ikkje kan dokumentera pedagogiske kvalifikasjonar, kan bli pålagd å gjennomføra eit kortare pedagogisk kurs.

Stillinga er lønna i lønssteg 54 i statens lønsregulativ. Høgare lønsstegsplassering vil kunna avtalast ut frå kvalifikasjonane til den einskilde søkjaren i samsvar med dei lønspolitiske retningslinene for høgskolen. Høgaste lønssteg er 75. Frå løna blir det trekt 2% som innskot i Statens Pensjonskasse.

Det krevst norsk doktorgrad eller tilsvarande kvalifikasjonar.

Søkjarar må gi opplysningar om fagleg og pedagogisk utdanning og praksis. Søknad med vedlegg, inklusiv maksimum 10 vitskaplege arbeid, må sendast inn i fire eksemplar saman med fullstendig liste over arbeida. Tilsetjingsreglementet kan ein få ved å venda seg til NHH.

På bakgrunn av eit personalpolitisk mål om at arbeidsstaben skal atterspegla den generelle folkesetnaden, både med omsyn til kjønn og kulturelt mangfald, blir spesielt kvinner og personar med minoritetsbakgrunn oppmoda om å søkja.

Dersom søkjarar står tilnærma likt, vil kvinnelege søkjarar bli føretrekte.

Dersom det ikkje er kvalifiserte søkjarar, kan tilsetjingsorganet føreta mellombels tilsetjing av ein av søkjarane for inntil tre år, dersom vedkomande etter tilsetjingsorganet si vurdering, har føresetnader for å skaffe seg dei turvande kvalifikasjonane i løpet av tilsetjingsperioden.

Søknad med opplysningar om utdanning og praksis, vitnemål og liste over vitskaplege arbeid, og eventuelt over andre arbeid som kan vera viktige for vurderinga av søkjaren sine kvalifikasjonar, blir å senda til Norges Handelshøyskole, personal- og organisasjonsavdelinga, Helleveien 30, 5045 Bergen.

Søknadsfristen er 17.03.2003
Denne fristen gjeld også for innsending av skriftleg arbeid.

Utlysingstekster og stillingsomtaler finnes på nettsida til personal- og organisasjonsavdelinga.