Bronsesvampen til Inger Stensaker

Bronsesvampen for våren 2010 er tildelt førsteamanuensis Inger Stensaker ved Institutt for strategi og ledelse. Stensaker får prisen for undervisningsinnsatsen på bachelorkurset SOL040.

18.05.2010 - Hallvard Lyssand

Bronsesvampen er studentane ved NHH sin semestervisse heider til ein førelesar dei meiner har gjort ein ekstra undervinsingsinnsats for bachelorstudentane ved høgskulen.

Under 17. mai-frukosten i Aulaen måndag vart det avslørt at prisen for vårsemesteret 2010 er tildelt førsteamanuensis Inger Stensaker for innsatsen på kurset SOL040 Strategisk leiing.

Det følgjande er utdrag av grunngjevinga påtroppande leiar av Bachelorfagutvalet i NHHS, Jan Lilleby, siterte då han overrekte prisen:

- Engasjert og ivrig i undervisninga, glimt i auget og godt humør som smittar, stor dedikasjon til faget og med ekstraordinær evne til å formidla pensum.

Inger Stensaker var bortreist, og hadde ikkje høve til å vera tilstades og ta imot prisen. Studentassistent Jørgen Kjær tok derfor i mot på hennar vegne.

Vinnaren av bronsesvampen vert valt gjennom ein kombinasjon av røysting blant kulla og ei vurdering utført av Bachelorfagutvalet.